ඊනියා යන පදයේ භාවිතය - අරුත් පහදුව 1

සිංහලෙන් මූණු පොතේ සහ බ්ලොග් ලියන මගේ හිතවතුන් වෙනුවෙන් මම අලුත් වැඩක් ආරම්භ කරන්න සිතුවෙමි. නිතර අපට හමුවන සිංහලභාෂාමය වැරදි නිවැරදි කර ගන්න සරල පිටිවහලක් සැපයීම එම කාර්‍ය්‍යයි. ව්‍යාකරණය, අක්ෂරවින්‍යාසය පමණක් නොවේ විවිධ භාෂාශෛලීන් සහ සම්ප්‍රදායයන් ගැනත් මෙහිදී කතා කරන්නට මම අපේක්ෂා කරමි. ඉදින් ඔබට හමුවන එවැනි ගැටලු වෙතොත් කරුණාකර එය මට දන්වා එවන්න. මම ඒවා එකතු කර මෙවැනි අරුත් පහදුව සටහනකින් එය පැහැදිලි කරමි. මෙය එම ලිපි පෙළේ පළමු වැන්නය.

ඊනියා යන පදය ඔබ සැම අසා ඇති යැයි සිතමි. නමුත් බොහෝ අයෙකු මෙහි අර්ථය නිවැරදිව දැන භාවිත කරන බවක් නොපෙනේ. ඊනියා සමාජවාදය, ඊනියා කාන්තා නිදහස වැනි යෙදුම්වලදී මෙය භාවිත වන්නේ 'අන්තවාදී' හෝ 'ආදානග්‍රාහී' වැනි අර්ථයකිනි. තවත් සමහරුන් එය 'ඉහත දක්වන ලද', 'එසේ කියන ලද' වැනි අර්ථවලිනුත් එය භාවිත කරන බව පසුව මට දැන ගන්නට ලැබුණි. නමුත් එවැනි අර්ථය මේ පදයේ නැත. ඊනියා මෙන්ම මීනියා යන පදයත් විද්‍යාචක්‍රවර්තී විසින් බුත්සරණ ලිවීමේදී යොදා පද දෙකකි. ඊනියා යන්නෙහි අර්ථය 'එම න්‍යාය' යන්නයි මීනියා යනු 'මෙම න්‍යාය' යන්නයි. න්‍යාය යන පදය මෙහි යෙදෙන්නේ ආකාරය යන තේරුම ලබා දීමට. ඒ අනුව, ඊනියා යන පදය 'එබඳු' 'එම ආකාරය' යන්නටත් මීනියා යන්න 'මෙබඳු' 'මෙම ආකාරය' යන්නටත් හුවමාරු කළ හැකි යෙදුමකි. ඉදින් 'ත්‍රස්තවාදය සම්බන්ධයෙන් ඊනියා කතිකාවක් ගොඩනඟන්න එපා' කියා කියත් නම් ඔය කියන්නේ මොන 'නියා' (මොන ආකාරයේ) කතිකාවක් ද කියා පෙරළා ප්‍රශ්න කළ යුතු වේ.

යම් විස්තරයක් සිදු කර ඉන් අනතුරු 'ඊනියා බුදුගුණ' කියා යොදනවා නම් හිතන්න, එහි අර්ථය කුමක් විය යුතු ද කියා. 'එබඳු' ස්වරූපයන්ගෙන් යුතු බුදුගුණ යන්නයි එහි අර්ථය. අද බොහෝ අය උපකල්පනය කරන අයුරින් එහි නිශේධාත්මක අර්ථයකුත් නැති බව මෙයින් වැටහී යා යුතුයි.

තවත් ගැටලුවක් ඇත. මෙය පද දෙකක් ද එකක් ද යන්නයි. ඇතැම් අයෙකු 'ඊ නියා' යනුවෙන් තවත් අයෙකු 'ඊනියා' යනුවෙන් ද ලියන බව පෙනේ. ඇත්තටම පද බෙදීම ගැන ලංකාවේ නිශ්චිත සම්මතයක් නැත. නමුත් මා හිතන්නේ මුල් පදයේ ප්‍රකෘති ස්වරූපය ක්ෂීණ වන අවස්ථාවක එය තනි පදයක් ලෙස ලිවිය යුතු බවයි. උදාහරණයක් ලෙස 'මෙය ළඟට' යන පදයේ මෙය යන්න 'මී' ලෙස ක්ෂය කර යොදයි. එවිට එය 'මීළඟ' යනුවෙන් එක් කොට ලියයි. මෙලෙසම 'එය ළඟට' යන පදයේ ද 'එය' යන්න ක්ෂය කළ විට 'ඊළඟට' කියා ලියයි. මේ ආකාරයෙන් ම 'මීනියා', සහ 'ඊනියා' යන පදත් තනිපදයක් ලෙස ලිවීම නිවැරදි බව මගේ හැඟීමයි.