ප්‍රශ්නය: මැරුණු කෙනා වෙනුවෙන් දෙන "පාංශුකූලය " යන්නෙහි තේරුම පහදන්න - කල්පනා ඒකරත්න...
පළමුවෙන්ම කියන්න ඕනේ නංගා, කෙනෙක් මැරුණාම පාංශුකූලයක් (පාලියෙන් පාංසුකූල) දෙන්න කියලා බුදුහාමුදුරුවන් කොතැනකවත් දේශනා කරලා නැහැ. දැනට සිංහල ගෙවල පවත්වා ගෙන යන පාංසුකූල චාරිත්‍රය හින්දූන්ගෙන් ගත් 'ශ්‍රාද්ධය' කියන චාරිත්‍රයේ අන්ධානුකරණයක්.දෙවැනියට කියන්න ඕනේ අත්තනායක මුදියන්සේලාගේ හේරත් මහතා අර දොරමඩලාවට ඇවිත් ඔය පාංසුකූලය කියන එකෙන් හැදෙන සිංහල පදය වන 'පවුල්' යනුවෙන් පවුල් සිවුර ආදී ලෙස යෙදෙන පදයයි ව්‍යවහාරයේ යෙදෙන පවුල (family) යන පදයයි එකතු කරලා දීපු මහා පොර අර්ථකථනය කිසිම වාග්විද්‍යාත්මක පදනමක් නැති එකක්.
පාංශු කිව්වේ පසට. කූල යන පදය යෙදෙන්නේ එකතු වීම, මිශ්‍ර වීම යන අර්ථයකට. යම් දෙයට අනුව එකතු වන විට තමයි අප අනුකූල (අනු + කූල) කියා කියන්නේ. ඒ අනුව පස් සමග මිශ්‍ර වීම, එකතු වීම තමයි පාංශුකූල කියා කියන්නේ.
ශාසනික අර්ථය මෙහෙමයි. යමක් පස්වලට එකතු වන්නේ ඒක අප භාවිතයෙන් ඉවත් කළහමයි. අමුසොහොන කියන සංකල්පය එදා තිබුණනේ. අඩුකුලේ උදවිය මැරුණහම ඒ අයව රෙද්දකින් ඔතලා ගිහින් සොහොනකට දානවා. මොකද එදා මිනිස්සු විශ්වාස කළා මිනිහෙක් මැරිණාම ඒ දේහය ආදහනය කළොත් ආත්මය පිතෘලෝකයට හෝ චන්ද්‍රලෝකයට යනවා කියා. ආදහනය කළේ නැත්තං ඒ ආත්මය මේ ලෝකයේම හොල්මනක් වගේ සැරි සරණවා කියා. ඉතින් අඩුකුලේ අය දිව්‍ය ලෝකයට එන එක වළක්වන්න තමයි ඔය අමුසොහොන කියන ක්‍රමය බ්‍රාහ්මණයන් හදුන්වලා දීලා තිබුණේ. ඉතින් මේ අයගේ සිරුර ඔතන්නේ ඒ තරම් වටින රෙදිවලින් නෙවේ. ඒක නේ කාළි කියන දාසිය ඉතා දුකසේ ඉපයූ මුදලින් රෙද්දක් අර ගත්තේ මිනිය ඔතන්න. මෙහෙම මිනිය ඔතල විසි කරන රෙද්ද කිසිම දේකට ගන්නේ නැහැ. ඒක නිකම් ම පොළොවට දිරා පත් වෙනවා. මේ නිසා මේ රෙද්දට කිව්වා පාංසුකූල රෙද්ද කියලා.
අද අමු සොහොන් නැති නිසා මිනිය රෙදිවලින් ඔතන්නේත් නැති නිසා වළදාපු මිනි ගොඩ අරන් ඒවයේ රෙදි ගලවන එක නීතිමය අපරාධයක් නිසා හාමුදුරුවන් ගෙදරට වඩම්මලා හාමුදුරුවනේ අපේ මේ මිය ගිය කෙනාගේ දේහය වෙනුවෙන් මෙන්න මේ රෙද්ද තියා ගන්න කියා 'සුදු රෙද්දක්' දෙනවා. ඒකට ඉතින් තාම කියන්නේ පොදුවේ පාංසුකූලය කියා තමයි.
ශාසනය තුළ ඔය මළසිරුර විතරක් නෙවේ පාංසුකූලයට අයත් වෙන්නේ. මීයන් කෑවා කියා අලුත්ම රෙදි වගයක් සිටුවරයෙක් විසික්කළාම ඒක බුදුහාමුදුරුවන් කුණු ගොඩෙන් අහුලා ගන්නවා. ඒකත් පාංසුකූලම තමා. තවත් පාංසුකූල අඹ මල්ලක් ගැන විනය පිටකයේ පාරාජිකා පාළියේ තියෙනවා.. ඒ අනුව මිනිසුන් භාවිතයෙන් අතහැර දැමූ හැම දේම පාංසුකූල ලෙස ශාසනය තුළ යෙදෙන බව වටහා ගන්න.
Comments
Post a Comment