මාධ්‍ය වාර්තාකරණය

මේ සිංහල අපගෙ රටයි
අප ඉපදෙන මැරෙන රටයි...

සේකරයන්ගේ ඒ පබැඳුම
දැන් දැන්
ඉඳහිටවත්
කිසිදු මාධ්‍යයකින් ඇහෙන්නේ නැත.
නන්දා මාලනිය
වැරදීමකින්වත්
දැන් එය ගයන්නේ නැත.

මේක ජාතිවාදී ගීයක්!

කලාකරුවන් ජාතිවාදයෙන් ඉවත් විය යුතු.

කලකට රහ ලු
කලකට වහ ලු.

සුනිල් ආරියරත්නයන්
ඉගෙන ගෙන දෙමළ
දැන් ලියන්නෑ ඔය බහු බූත.
ඒ වෙනුවට
පරිවර්තනය කරනවා
දෙමළ රාමායණය
සිංහලට
කියා දෙන්න අපේ අයට
ඉන්දියාවේ රාම
ලංකාවේ රාවණව මැරූ හැටි.

මේ හින්දයි අප උද්ඝෝෂණය කරන්නේ

කෑගහමු අපි
මේ....... සිංහල
අපේ රටයි
අප........ ඉපදෙන
මැරෙන රටයි

තෙරුවන් වැඳ
පන්සිල් ගෙන
ඇරඹුවෙමු අපි අපේ ගමන
විහාර මහාදේවි උද්‍යානයේ බුදුරුව අසලින්
බොරැල්ලේ තරුණ බෞද්ධ සමිති ශාලාවට...

“අද අපට වීරයෙක් අවශ්‍යයි
දියසේන ඉපදෙනකං බලං ඉන්න බෑ
අනගාරික ධර්මපාල
හික්කඩුවේ සුමංගල නාහිමි වගේ
ශ්‍රේෂ්ඨ නායකයන් අපට අවශ්‍යයි
අද ඒ මිනිස්සුන්ට ඉපදෙන්නවත් දෙන්නෑ
තිඹිරි ගෙදරදීම මරල දානවා”

මට මතකයි
මීට ටික දවසකට ඉස්සර
හම්බවුණා මට
දියසේන කුමාරයව.

නම
ටිකිරි බණ්ඩාරලාගේ දියසේන
තාත්තා බෞද්ධ
අම්මා කතෝලික
අම්මාගේ බල කිරීමට
තාත්තා හැරුණා කතෝලික ආගමට
පල්ලියෙන් බඳින්න
‘පවුල්පොත’ ලබා ගන්න.
නැතිනම් පවුල්පොත
ලැබෙන්නෑ මිනීවළ පල්ලියේ කනත්තෙන්.

(පල්ලිය ගැන කලකිරී
ජීවිතේට පල්ලි නොගිය
ඒ වුණාට
දෙවියන් වහන්සේ වෙනුවෙන් කැපවුණු
සියදොරිස් සෙබස්තියන් උන්නැහේ මැරුණාමත්
වළ දැම්මේ ‘බුද්දාගමේ කනත්තේ’.
අහලපහල අය පාංසකූලෙත් දුන්නා
හාමුදුරුවන්ට බොරු කියලා.)

ඉතින් ඊට පස්සේ

බවුතීස්ම කළා
මාස තුනේ දියසේනව
එහෙම නැත්තං ලැබෙන්නෑ හොඳ ඉස්කෝලයක්

කොලුවගෙ ආච්චියි සීයයි
බැලුවා කේන්දරේ
ගමේ පන්සලේ පණ්ඩිත හාමුදුරුවන්ගෙන්
“මේක බොහොම බලගතු කේන්දරයක්
ග්‍රහයො හතර දෙනෙක් උච්චයි
විපරීත රාජයෝගයකුත් තියෙනවා
මූනං කවද හරි රජ වෙනවා.
මහාපණ්ඩිතයෙක් වෙනවා.
පුළුවන්නං කොලුවව මහණ කරන්න
රට ජාතිය බබලවන වීරයෙක් වෙනවා...”
“කොලුවගෙ අම්ම කැමති නෑ හාමුදුරුවනේ...”

කොලුවා ලොකු වුණාම
ඇතුළු කළා අගනුවර ජනප්‍රිය ජාතික පාසලකට
‘ශාන්ත ............ විද්‍යාලයට අපි ඔබව සාදරයෙන් පිළිගනිමු.’

“මුලින්ම අපි එකඟතාවයකට එමු.
මේ පාසලේ ඉගෙන ගන්නා කාලය තුළ
වෙන කිසිම ආගමක් ඉගෙන ගන්න තහනම්”
“අපි එකඟයි ෆාදර්.....”

එදා සිට ඔහු ඉගෙන ගත්තේය
පරණ ගිවිසුම
අලුත් ගිවිසුම
යුදා ඉතිහාසය
යුරෝපීය සංස්කෘතිය

‘සත්‍යය ද මාර්ගය ජීවනය ද මම වෙමි. මා මඟින් මිස කිසිවෙක් පියාණන් වහන්සේ වෙත නොපැමිණෙන්නෝය. ඔබ මා හඳුනන්නාහු නම් මාගේ පියාණන් වහන්සේත් හඳුනන්නාහුය. මෙතැන් පටන් ඔබ උන්වහන්සේ හඳුන්නාහුය. උන්වහන්සේ දැක ඇත.i’

‘සුද්ධී අසුද්ධී පච්චත්තං
නාඤ්ඤෝ අඤ්ඤං විසෝධයෙii’

“දැන් දියසේන ලොකුයි
ඉංග්‍රීසීත් හොඳට පුළුවන්
අපි මෙයාට ඉංග්ලිෂ් මීඩියම් එකෙන් උගන්නමු ද?”
“හොඳයි ෆාදර්.....”

‘ගුරුසිත නොරිදවා
වේලාව නොවරදවා’

හැම් බර්ගර් කේ. එෆ්. සී. චිකන් කකා
ස්ප්‍රින් ඇඳක බුදියාගෙන දුක් නොතකා
ඉම්පෝර්ටට් ඩෙනිම් ටීෂර්ට් ඇඳ නොවකා
ඇල්මෙන් අකුරු උගනී ඉදිරි වැඩ තකා

කොලුවා දැන් උසස් පෙළ...

ගැහුවා කොක්කක්
බ්‍රිජට් එකේ කෙල්ලකට
මාර කෑල්ල
ඇනා ශර්පෝවා වගේ
කකුල් දෙකම එළියෙ දාන්
කොටට කොටේ සාය ඇදන්
ටෙනිස් ගහන්නට යනකොට
මූ ගියා පස්සෙන්
දැන් සෙට්.

කොලුවා දැන් වැඩිපුරම ඉන්නේ
එම් සී එකේ
ලිබර්ටි එකේ
විහාර මහාදේවී පාර්ක් එකේ

උසස් පෙළ අසමත්...

අපි දෙන්නා මුණ ගැහුණා
මහා භාණ්ඩාගාරය ඉදිරිපිට ඇති
කැරොකෙ සමාජ ශාලාවේ සිට
එළියට එනකොට මොහු
අඩ සිහියෙන්
සුදු ගෑනු ළමයෙකුගෙ කරට අත දාගෙන.

“ඇයි මේ
මල්ලි සිංහලයෙක් නේ ද?”
මම ඇසීමි.
“සිංහලයෙක්.....!
‍වට් නෝන්සන්ස්
අයිම් නොට් අ සිංහලීස්
අයිම් අ ශ්‍රී ලංකන්...”

එදා ඉඳන් මං හිතුවේ
කරන්න ඕනැ උද්ඝෝෂණයක්
කරන්න ඕනැ විප්ලවයක්

මේ සිංහල අපගෙ රටයි
අප ඉපදෙන මැරෙන රටයි
එහෙම කියන්නේ ඇයි?
නැද්ද අයිතියක් සිංහලයට මෙන්
දෙමළ මිනිහට
මුස්ලිම් මිනිහට
බර්ගර් මිනිහට
............. මිනිහට
ජීවත් වෙන්න මේ රටේ?
නැද්ද අයිතියක්
නැද්ද අයිතියක්
කියාපල්ල මට නැද්ද අයිතියක්?

අයිතිය
අයිතිවාසිකමක් නොවේ
මිනිසාට ඉබේම ලැබෙන
පාරිතොෂිකයකි එය
සුදුසුකම් සපුරා ලබා ගත යුතු.
මෙරටේ ජීවත් වීමේ අයිතිය ලැබෙනුයේ
මෙරට ගැන හිතන
මෙරටේ
සමෘද්ධිය
සංස්කෘතිය
ප්‍රෞඪත්වය ගැන
හිතන
ක්‍රියා කරන අයටමය.
ඔහුය සිංහලයා;
ඔහුගේ භාෂාව කුමක් වුවත්
ඔහුගේ ආගම කුමක් වුවත්
ඔහුය සිංහලයා;
ඔහුටය මෙරටේ අයිතිය ජීවත් වීමට.

පෘථග්ජන මනස තුළ
වැඩෙයි භව තෘෂ්ණාව
අහස මෙන් උසට
පොළොව මෙන් පළලට.
උපස්ථම්භක වෙයි එයට
රට, ජාතිය, ආගම
උපාදාන ලෙස

සංකප්පරාගො පුරිසස්සකාමොiii

.........

උදේ පටන් රෑ වන තුරු
ජීවිතයේ තුන් වේලම
රට, ජාතිය, ආගම යන මේවා
අරගත යුතු ය
මේ තියෙන අනුපිළිවෙලටම
නැතිනම් වස වේවි.
‘සර්පයා වැරදි ලෙස නොගන්න....iv’

රටට වඩා ජාතියත්
ජාතියට වඩා ආගමත්
ලොකු කර ගත්තෝ
මෙරට මරු මුවට ගෙන යන්නෝය.

ඒකයි අප උද්ඝෝෂණය කරන්නේ

මේ සිංහල අපගෙ රටයි
අප ඉපදෙන මැරෙන රටයි
එල්. ටී. ටී. ඊ ය
මරා දාමු
නොර්වේ
පන්නාදාමු
කවුද බොලේ සුදු කොටියා
නොර්වේ තමයි සුදු කොටියා
“ඇයි නෝර්වේ ?”

“නෝර්වේ යනු ක්‍රිස්තියානි රටකි. උග්‍ර ආගම්වාදයක් පවතින මේ රටේ ක්‍රිස්තියානි නොවන කිසිවෙකුට ජිවත්විය නොහැක. 2000 වසරේදී වෙසක් දිනය ජාත්‍යන්තර නිවාඩු දිනයක් කිරීමට රාජ්‍ය නායකයන් කැමැත්ත පළ කරද්දී විරුද්ධ වූයේ නොර්වේමය. මෙරට ඉංග්‍රීසි අධ්‍යාපනය දියුණු කරමින් පාසල් ඉංග්‍රීසි පෙළ පොත් නොමිලේ මුද්‍රණය කෙරෙන්නේ ද නෝර්වේ ආධාර මතය. .....”

ඒ හින්දා අපට සැකයි
ඇයි නෝර්වේ?
මීයක් කඩන්නේ
අත ලෙවකන්නම ද?

මේ නිසා අපි අරගල කරමු
නොර්වේ කොඩිය පුච්චා දමා
තානාපති කාර්යාලයට ගල් ගසා
අපි උද්ඝෝෂණය කරමු.

මේ යන මඟ
අපත් සමග
මුල සිටම
අපට හිටිය ලොකුම හයිය
ජනමාධ්‍යයය.

ඇස් ඇරගෙන සිටින විට ජනමාධ්‍යය
ඇස් ඇරගෙන සිටිනු ඇත ජනතාව.
කඩේ යන විට ජනමාධ්‍යය
පරිභෝජනය කරනු ඇත ජනතාව.

අතර මඟදි
එක් තැනකදි
දික් කළා කැමරාවක්.
කවුද?

එල්මෝ ප්‍රනාන්දු

කෑගහපන් කෑගහපන්
එල්මෝ ඉන්නවා

කාගෙද මේ සන්දේසේ
එල්මෝගේ සන්දේසේ
බී. බී. සී සන්දේසේ
එල්මෝගේ සන්දේසේ

“පාවා දෙමින් රට ජාතිය
එල්. ටී. ටී. ඊයට පක්‍ෂපාතීව
බී. බී. සී. සන්දේශයට ලියන
එල්මෝ නම් මොහු ය.”
එකෙක් දිගහරියි ඔහු ගේ කැරැට්ටුව
දන්නා නොදන්නා සැමට
දැන ගැනීම පිණිස.
එවිට එකෙක් කෑගසයි

“අන්න කවුද එල්මෝට ගහනෝ...........”

ගහපියවු! ගහපියවු!
ඕකාට ගහපියවු!
කුළු හරක් රැළ
වැට බින්දෝය එවිට.

මමත් දිව ගොස් එබී බැලීමි.
ප්‍රමාදය මා.
පොලීසිය ඔහුව ගෙන ගොස් ඇත.
පිරිස සන්සුන් වී ඇත.
ගහපු එකෙක් අහලකවත් නැත.

ක්‍රියාවක් මිස
ක්‍රියා කරන්නෙකු නැත.

පාණ්ඩිත්‍ය මතු කරන
බරසාරු වචන වැල්
ඔද තෙද වඩන කියමන්
සහිත
දේශමාමක, ජාතිමාමක දේශන මාලාවකට
අවසානයේ දී අපි සවන් දුනිමු.

දැන් හරි
ඔක්කෝ ම හරි
හෙට උදේ වෙනකොට
රට ම දැන ගනී
අපි බිහි කළ බලවේගය
ජාතික, විජාතික, පරගැති බලවේග සියල්ල
නිෂ්ප්‍රභ කරන...
...................................................

මෙන්න ප්‍රවෘත්ති...

ත්‍රස්තවිරෝධි ජාතිකව්‍යාපාරය මගින් පටු ජාතිවාදය උදෙසා අද දිනයේ පැවත් වූ උද්ඝෝෂණයේ දී ප්‍රවීණ මාධ්‍යවේදී එල්මෝ ප්‍රනාන්දු මහතාට පහර දී ඇත. ඔහුව මේ වන විට කොළඹ ජාතික රෝහලේ හදිසි අනතුරු අංශයේ දැඩි සත්කාර ඒකකයට ඇතුළත් කර ඇත. .........v

i ශු. ජොහාන් 14:6

ii පිරිසුදු වීම, අපිරිසිදු වීම පෞද්ගලික කාරණයකි. කෙනෙක් තවකෙනෙකු පිරිසුදු කරන්නේ නැත - ධම්මපද: 165.

iii මිනිසා ගේ රාගය සංකල්පීයය - සංයුත්ත නිකාය: දේවතා සංයුත්ත: නසන්ති සූත්‍රය.

iv මජ්ඣිම නිකාය: 01: අලගද්දූපම සූත්‍රය.

v සත්‍ය සිදුවීමක් ඇසුරින් කරන ලද ප්‍රබන්ධයකි. සිදුවීම් අනුපිළිවෙල හා ඇතැම් කරුණු මනඃකල්පිතය.